Category: Ferðasögur

Sæll Skúli og TAKK FYRIR SÍÐAST!

Við fórum með umboðsaðila Norwegian Cruise Line í siglingu um Karabíska hafið um síðustu páska. (2016).

Þetta var okkar fyrsta sigling. Ferðin var í alla staði dásamleg og stóð svo sannarlega undir væntingum. Hótelið í Orlando er gott og frábærlega staðsett og skipið maður – SKIPIÐ! Þar vorum við svo sannarlega á 5 stjörnu fljótandi hóteli. Klefinn passleg stór og vel útbúinn og ekki skemmdu svalirnar. Allur matur mjög góður og hægt að borða hreinlega allan sólarhringinn. Hreinlætið um borð til algjörrar fyrirmyndar. Virkilega fært tónlistarfólk og skemmtikraftar. Hægt að velja á milli staða um allt skip hvort sem maður vildi rólegheit eða stuð. Dagskrá allan daginn ef maður vildi ekki liggja í sólbaði og lesa bók. Góðar upplýsingar um allt skip um það hvað væri um að vera. Börn og unglingar höfðu í nógu að snúast. Starfsfólk skipsins stendur þó upp úr sem yfirmáta glaðlegt, vinalegt og hjálpsamt. Yfirmenn voru sýnilegir og andinn í skipinu var eitthvað svo samheldinn og góður. Það eina sem við sáum neikvætt var spilavítið sem er stórt.

Við fórum í eina skipulagða ferð. Það var á Jamaica. Þar fórum við í Bob Marley ferð í gamalli rútu. Það var upplifun sem við hefðum aldrei viljað missa af.

Skúli Unnar Sveinsson var fararstjóri í þessari ferð. Maðurinn er hreint út sagt dásamlegur. Hann var í tölvupóstsambandi frá því um áramót og þar til við fórum út. Við vorum því gríðarlega vel undirbúin og ekkert kom á óvart. Þegar út kom fengum við áframhaldandi góðar upplýsingar um það sem var á döfinni og einhvernvegin var eins og maðurinn gæti “klónað sig” því hann var alltaf til staðar.

Við hikum ekki við að mæla með þessari ferð og þessu skipi – en við mundum fara hvert sem er með Skúla!

Gunnhildur Gylfadóttir og Hjálmar Herbertsson

Við hjónakornin viljum þakka þér kærlega fyrir frábæra fararstjórn í ferðinni um Karabíska hafið með Getaway um páskana 2016.

Ferðin var í alla staði frábærlega skipulögð og allt stóðst sem stafur á bók. Þú ert í senn yfirvegaður og afar þægilegur fararstjóri með auga fyrir öllum þáttum þíns starfs.

Frábært að leita til þín, hvenær sólarhrings sem farþegar þurfa sem eykur öryggi ferðarinnar.

Hlökkum til að fara aftur með ykkur undir þinni stjórn.

Kær kveðja, Hreinn og Kolbrún

Við hjónin höfum farið í margar utanlandsferðir með fararstjórum. Þeir hafa verið misjafnir eins og gengur. Allt frá því að skipta sér lítið af farþegunum upp í það að vera stöðugt að fræða fólk og segja frá.

Við höfum að vísu ekki farið í siglingu á skemmtiferðaskipi fyrr þannig að þessi ferð til 10 borga við Miðjarðarhafið var töluverð lífsreynsla fyrir okkur.

Varðandi fararstjórn Skúla þá var hún frábær. Hann undirbjó okkur mjög vel fyrir ferðina, minnti okkur á það sem við þurftum að gera í tæka tíð. Hann var vakandi og sofandi yfir velferð okka allan tímann í ferðinni og passaði sig á því að gera ekki of lítið og ekki of mikið með okkur þannig að hann var mjög þægilegur. Þetta er ábyggilega vandrataður meðalvegur svo að öllum líki. Hann var alltaf stundvís og aflaði sér allra upplýsinga sem hægt var um ferðina og þá staði sem við komum á og var góður leiðsögumaður um þær mörgu fögru borgir sem við heimsóttum í ferðinni.

Takk fyrir frábæra ferð og líka skemmtilegt samferðafólk sem við þekktum ekkert fyrir ferðina.

Kristín og Ómar

Sæll Skúli og takk fyrir síðast.

Við viljum þakka þér fyrir frábæra ferð og góða fararstjórn, þessi ferð er sú besta sem við höfum farið í á undanförnum árum,

með bestu hveðju

Hrafnhildur og Gísli

Sæll Skúli,

bestu þakkir frá okkur fyrir góða ferð sem þú gerðir frábæra, það verður örugglega leitað til þín aftur þegar þessi hópur fer í næstu ferð. Skipið var í sjálfum sér gott en okkur fannst það full stórt, allt fæði óaðfinnanlegt og mikið úrval, við myndum samt frekar kjósa klefa með svölum.

Kær kveðja frá okkur,

Ingunn og Símon

Sæll Skúli

Takk fyrir síðast á ferð okkar um Miðjarðarhafið.

Við viljum þakka fyrir frábæra ferð og góða fararstjórn.

Allt stóðst sem stafur á bók

Kveðja Helga og Sigurður

Sæll Skúli

Fyrir hönd saumaklúbbsins og fylgifiska vil ég þakka þér kærlega fyrir alveg frábæra ferð [með EPIC um Miðjarðarhafið (í september). Við vorum öll alveg afskaplega ánægð með ferðina í alla staði, þetta fór í raun og veru langt fram úr þeim væntingum sem við gerðum, gott skipulag á öllu varðandi skipafélagið og góð fararstjórn af þinni hálfu.

Það var frábært að hafa þig með okkur, okkur til halds og trausts og þegar við vorum að tala saman um að það væri gott að hitta Skúla núna, þá birtist þú bara, þetta kom oft fyrir. Gönguferðirnar með þér voru mjög góðar og allir gátu verið með í þeim.

Síðan fórum við hópurinn að lokinni siglingunni frá Barcelona til Lloret de Mar í 4 nætur í algjöra afslöppun eftir siglinguna og á þessu líka fína hóteli sem þú pantaðir fyrir okkur og þú reddaðir rútinni fyrir okkur og allt stóðst þetta sem stafur á bók.

Takk kærleg fyrir okkur fyrir yndislega ferð og bestu kveðjur frá okkur í saumaklúbbnum og fylgifiskum.

Karen Emilsdóttir

Ingi Garðar Magnússon laumaði nokkrum vísum að fararstjóra í ferð með Star um Eystrasaltið í maí.

Með Skúla og öðrum skemmti ég mér
með skipi á Eystrasalti.
Dýrðlega svo drekk ég hér
dós af köldu malti.

Á Eystrasalti í sumri og sól,
í sundlauginni er gaman.
Þar skemmtunina Skúla fól
og skemmtum okkur saman.

Í Helsinki settist hópurinn niður og fékk sér hressinug eftir að hafa skoðað hina stórkostlegu steinkirkju. Þá kom þessi:

Finnski bjórinn finnst mér hér
flott af öðrum bera.
Dýrðlega hann drukkinn er
og drjúgur skal hann vera.

Breyta varð silgingarleiðinni og ekki komið við í Stokkhólmi þar sem of mikill vindur var þannig að jafn stjór skip og Star fengu ekki að sigla þar inn. Þá orti Ingi:

Í Stokkhólmi ei stansað var
stór of þótti báran.
Líka ei sáum lífið þar,
það ljúft mig gerði sáran.

Framhjá Svíþjóð sigldum við
svo var úfinn sjórinn.
Glaðlega að góðum sið
glöð við drukkum bjórinn.

Eins og oft vill verða í svona ferðum bætir fólk aðeins á sig enda mikill og góður matur alla daga. Ingi hafði þetta að segja um það:

Sólin skín og báran blá
býsna langt er strikið.
Ljúlflega það loks ég sá
að ljótt er á mér spikið.

Sæl,

Takk fyrir síðast. Brosið nær ennþà allan hringinn og við erum búin að stofna safnreikning fyrir næstu ferð.

Við finnum ekkert sem við getum kvartað yfir þetta var bara fràbær upplifun frá upphafi til enda, eintóm sæla.

Kær kveðja,

Helga og Jonni